ഏക പ്രതീക്ഷയായിരുന്ന പശുക്കൾ കൂട്ടത്തോടെ ചത്ത് പുതുവർഷം ദുഃഖദിനമായെങ്കിൽ, മാത്യുവിനെയും കുടുംബത്തെയും പിറ്റേന്ന് കാത്തിരുന്നത് സുമനസ്സുകളുടെ ചേർത്തു പിടിക്കലുകളായിരുന്നു

02-01-2024

ഇടുക്കി: ഏക പ്രതീക്ഷയായിരുന്ന പശുക്കൾ കൂട്ടത്തോടെ ചത്ത് പുതുവർഷം ദുഃഖദിനമായെങ്കിൽ, മാത്യുവിനെയും കുടുംബത്തെയും പിറ്റേന്ന് കാത്തിരുന്നത് സുമനസ്സുകളുടെ ചേർത്തു പിടിക്കലുകളായിരുന്നു. ഏകസമ്പാദ്യമായിരുന്ന ഫാമിലെ പശുക്കൾ ഒറ്റ ദിവസം കൊണ്ട് കൂട്ടത്തോടെ ചത്ത് പ്രതിസന്ധിയിലായ കുട്ടികർഷക കുടുംബത്തിന് നിരവധി മേഖലകളിൽ നിന്നാണ് സഹായ ഹസ്തമെത്തിയത്.

സർക്കാരും സിനിമ മേഖലയും സിപിഎമ്മും ലുലു ഗ്രൂപ്പും ഈ കുട്ടിക്കർഷകരെ നെഞ്ചോട് ചേർത്തു. മാത്യുവും അമ്മ ഷൈനിയും ചേട്ടന്‍ ജോര്‍ജും അനുജത്തി റോസ്മേരിയും ഉള്‍പ്പെട്ട കുടുംബത്തിന്‍റെ ഏക ഉപജീവനമാര്‍ഗവുമായിരുന്നു ഈ കന്നുകാലികൾ. ഏവരും നെഞ്ചോട് ചേർത്തതോടെ സന്തോഷത്തിലാണ് ഈ കുട്ടികൾ. ഇത്രയധികം സഹായം കിട്ടുമെന്ന് പ്രതീക്ഷിച്ചിരുന്നില്ലെന്നും വളരെയധികം സന്തോഷമുണ്ടെന്നും കുടുംബം പ്രതികരിച്ചു. പശു വളർത്തൽ കൂടുതൽ ഊർജിതമായി നടത്തുമെന്നും മാത്യു പറഞ്ഞു.

മന്ത്രിമാരായ ചിഞ്ചുറാണിയും റോഷി അഗസ്റ്റിനുമാണ് കുട്ടികർഷകരായ മാത്യുവിനെയും ജോർജുകുട്ടിയെയും കുടുംബത്തെയും കാണാൻ ഇന്ന് രാവിലെ ആദ്യം വീട്ടിൽ എത്തിയത്. തുടർന്ന്, ഒരാഴ്ചക്കുളളിൽ അഞ്ച് പശുക്കളെ ഇൻഷുറൻസ് പരിരക്ഷയോടെ മാത്യുവിന് നൽകുമെന്ന് മന്ത്രി അറിയിച്ചു. മിൽമയുടെ ഭാഗത്തുനിന്ന് 45,000 രൂപയുടെ സഹായവും കുടുംബത്തിന് നൽകി. കേരള ഫീഡ്സിന്‍റെ ഒരു മാസത്തെ കാലിത്തീറ്റ സൗജന്യമായി നൽകുമെന്നും മന്ത്രി അറിയിച്ചു. മന്ത്രിസഭാ യോഗത്തിൽ വിഷയം അവതരിപ്പിക്കുമെന്നും മന്ത്രി വിശദമാക്കി. തുടർന്നും കൃഷി മുന്നോട്ട് കൊണ്ടുപോകാനുള്ള എല്ലാവിധ പിന്തുണയും സർക്കാരിന്‍റെ ഭാഗത്തുനിന്ന് ഉണ്ടാകുമെന്ന് മന്ത്രി മാത്യുവിനും കുടുംബത്തിനും ഉറപ്പുനൽകി. ബ്ലോക്ക്, പഞ്ചായത്ത്, ജില്ലാ തലങ്ങളിൽ ഏകോപിപ്പിച്ചുകൊണ്ടുള്ള ഒരു സഹായപദ്ധതി മാത്യുവിന് നൽകുമെന്നും മന്ത്രി പറഞ്ഞു.

മന്ത്രിമാർ പോയതിനു പിന്നാലെ അബ്രഹാം ഓസ്ലര്‍ സിനിമയുടെ അണിയറപ്രവര്‍ത്തകരും നടന്‍ ജയറാമും കുട്ടിക്കർഷകർക്ക് സഹായവുമായയെത്തി. അഞ്ച് ലക്ഷം രൂപയാണ് സഹായധനമായി ജയറാം കൈമാറിയത്. പത്താം ക്ലാസ് വിദ്യാർഥിയായ മാത്യു ബെന്നിയെയും കുടുംബത്തെയും സന്ദർശിച്ച ജയറാം

സമാന അനുഭവം ആറുവർഷം മുന്‍പ് തനിക്കുണ്ടായെന്നും പറ‍ഞ്ഞു. സിനിമ മേഖലയിൽനിന്ന് വീണ്ടും ഇവർക്ക് സഹായമെത്തി.നടൻ മമ്മൂട്ടി ഒരു ലക്ഷം രൂപ വാഗ്ദാനം ചെയ്തിട്ടുണ്ട്. പൃഥ്വിരാജ് രണ്ട് ലക്ഷം രൂപയാണ് നൽകിയത്.

പിജെ ജോസഫ് എംഎൽഎ ഒരു പശുവിനെ നൽകി. അപു ജോൺ ജോസഫാണ് കുട്ടികൾക്ക് പശുവിനെ കൈമാറിയത്. കുട്ടികൾക്ക് സഹായവുമായി സിപിഎമ്മും രംഗത്തെത്തി. സംസ്ഥാന സെക്രെട്ടറി എംവി ഗോവിന്ദൻ മാസ്റ്റർ കുട്ടികളെ വിളിച്ച് രണ്ട് പശുക്കളെ വാഗ്‌ദാനം ചെയ്തു. ലുലു ഗ്രൂപ്പ് ചെയർമാൻ എംഎ യൂസഫലിയുടെ നിർദേശ പ്രകാരം ലുലു ഗ്രൂപ്പ് 10 പശുക്കളെ വാങ്ങാനായി അഞ്ച് ലക്ഷം രൂപ മാത്യുവിന്‍റെ വീട്ടിലെത്തി കൈമാറി. പ്രതിപക്ഷ നേതാവ് വി ഡി സതീശനും കുട്ടികൾക്ക് സഹായം വാഗ്ദാനം ചെയ്തിട്ടുണ്ട്.