വയോധികരെ കബളിപ്പിക്കുന്ന ‘ബാംബു ബോയ്‌സ്’ പിടിയിലായി

08-12-2023

പത്തനംതിട്ട: വയോധികരെ കബളിപ്പിക്കുന്ന ‘ബാംബു ബോയ്‌സ്’ പിടിയിലായി. കൊല്ലത്തുനിന്നു ആറന്മുളയിലെ വീട്ടിലെത്തി 10,000 രൂപയുടെ ബാംബു കർട്ടൻ ഇട്ടശേഷം ഭീഷണിപ്പെടുത്തി പണവും ചെക്കുമായി ഒരു ലക്ഷത്തോളം രൂപ വാങ്ങിയ യുവാക്കളാണ് ആണ് പോലീസിന്റെ പിടിയിൽ അകപ്പെട്ടത്. അടുത്തിടെ തിരുവല്ലയിലും സമാന സംഭവം നടന്നിരുന്നു. വയോധികർ തനിച്ച് താമസിക്കുന്ന വീട്ടിലെത്തി ബാംബു കർട്ടൻ ഇട്ടശേഷം അവരെ കബളിപ്പിച്ച് അമിതമായി പണം വാങ്ങിയ കേസിലാണ് അറസ്റ്റ്

കൊല്ലം തഴവ വെട്ടുവിളശ്ശേരിയിൽ ഹാഷിം (46), ശൂരനാട് നോർത്ത് അൻസു മൻസിൽ തെക്കേമുറി അൻസിൽ (29), ശൂരനാട് സൗത്ത് കടമ്പാട്ട് വിള തെക്കേതിൽ റിയാസ്(25) എന്നിവരാണ് അറസ്റ്റിൽ ആയത്. എർട്ടിഗ വാഹനത്തിൽ പ്രതികൾ മൂന്നുപേരും കൂടി വിവിധ ഭാഗങ്ങളിൽ കർട്ടൻ വിൽപ്പനയ്ക്കായി കറങ്ങിനടന്ന് പ്രായമായ ആൾക്കാർ മാത്രം താമസിക്കുന്ന വീടുകൾ കണ്ടെത്തുകയാണ് ആദ്യ ജോലി. തുടന്നാണ്‌ തട്ടിപ്പിനുള്ള ഒരുക്കം തുടങ്ങുന്നത്.

കഴിഞ്ഞ മാസം 30ന് ഉച്ചക്ക് ഒരു മണിയോടുകൂടി ആറന്മുള സ്വദേശിയായ പ്രായമായ സ്ത്രീയുടെ വീട്ടിൽ ഇവർ എത്തുകയും സ്ക്വയർ ഫീറ്റിന് 200 രൂപ നിരക്കിൽ ബാംബു കർട്ടൻ ഇട്ടു നൽകാമെന്ന് പറഞ്ഞു വിശ്വസിപ്പിക്കുകയും ചെയ്തു. എന്നാൽ കർട്ടൻ ഇട്ടശേഷം 45,000 രൂപ വേണമെന്ന് ആവശ്യപ്പെടുകയായിരുന്നു. സ്ത്രീ തൻ്റെ കൈവശമുണ്ടായിരുന്ന 14,000 രൂപ നൽകി. ബാക്കി തുകയ്ക്കായി രണ്ട് എഴുതാത്ത ചെക്കുകൾ പ്രതികൾ വാങ്ങുകയും അവയിൽ ഒരു എണ്ണം അന്നുതന്നെ ബാങ്കിൽ ഹാജരാക്കി 85,000 രൂപ കൂടി പിൻവലിച്ച് എടുക്കുകയായിരുന്നു.

10,000 രൂപയിൽ താഴെ വിലയുള്ള കർട്ടൻ സ്ഥാപിച്ച ശേഷം 99,000 രൂപ ഇവർ ഈടാക്കിയതായി അന്വേഷണത്തിൽ കണ്ടെത്തി. ഇവർ സഞ്ചരിച്ച വാഹനവും പിടിച്ചെടുത്തിട്ടുണ്ട്. കേരളത്തിൽ പലഭാഗത്തും സമാനമായ തട്ടിപ്പ് നടത്തിയിട്ടുണ്ടോ എന്ന് കൂടുതൽ അന്വേഷണം നടത്തിവരികയാണ്. പത്തനംതിട്ട ജില്ലാ പോലീസ് മേധാവി വി അജിത്ത്ന്റെ നിർദേശപ്രകാരം, പത്തനംതിട്ട ഡിവൈഎസ്പി എസ് നന്ദകുമാറിന്റെ മേൽനോട്ടത്തിൽ ആറന്മുള പോലീസ് സ്റ്റേഷൻ ഇൻസ്പെക്ടർ സി കെ മനോജ്, എസ്ഐ അലോഷ്യസ്, എസ്ഐ ജയൻ, എസ്ഐ നുജൂം, എസ്ഐ ഹരീന്ദ്രൻ, എഎസ്ഐ വിനോദ്, സലിം, സെയ്ഫുദ്ദീൻ, കിരൺ എന്നിവർ അടങ്ങിയ സംഘമാണ് അന്വേഷണം നടത്തുന്നത്.