തിരുവനന്തപുരം നഗരപരിധിയിൽ പ്രവർത്തിക്കുന്ന എല്ലാ സർക്കാർ സ്ഥാപനങ്ങൾക്കും വിദ്യാലയങ്ങൾക്കും ഡിസംബർ പതിനഞ്ചിന് അവധിയായിരിക്കുമെന്ന് ജില്ലാ കളക്ടർ ജെറോമിക് ജോര്‍ജ്

03-12-2023

തിരുവനന്തപുരം: പ്രശസ്ത ഇസ്ലാംമത ആരാധനാലയമായ തിരുവനന്തപുരം ബീമാപ്പള്ളിയിലെ ഉറൂസിനോടനുബന്ധിച്ച് പ്രദേശിക അവധി പ്രഖ്യാപിച്ചു. ഡിസംബർ പതിനഞ്ചിനാണ് അവധി പ്രഖ്യാപിച്ചത്. തിരുവനന്തപുരം നഗരപരിധിയിൽ പ്രവർത്തിക്കുന്ന എല്ലാ സർക്കാർ സ്ഥാപനങ്ങൾക്കും വിദ്യാലയങ്ങൾക്കും ഡിസംബർ പതിനഞ്ചിന് അവധിയായിരിക്കുമെന്ന് ജില്ലാ കളക്ടർ ജെറോമിക് ജോര്‍ജ് പുറത്തിറക്കിയ ഉത്തരവിൽ വ്യക്തമാക്കി.

പ്രാദേശിക അവധി പ്രഖ്യാപിച്ചെങ്കിലും അന്നേദിവസം നടത്താനിരുന്ന പരീക്ഷകൾക്ക് അവധി ബാധകമായിരിക്കില്ലെന്ന് ഉത്തരവിൽ വ്യക്തമാക്കുന്നുണ്ട്. ഡിസംബർ പതിനഞ്ച് മുതൽ 25വരെയാണ് ബീമാപ്പള്ളി ദർഗാ ഷെരീഫ് വാർഷിക ഉറൂസ് മഹോത്സവം നടക്കുക. ഉറൂസ് മഹോത്സവത്തിൻ്റെ ആദ്യ ദിവസം അവധി അനുവദിക്കുന്നതിന് മുൻകൂർ അനുമതി ലഭിച്ചിരുന്നു. ഇതുപ്രകാരമാണ് ഡിസംബർ പതിനഞ്ചിന് പ്രാദേശിക അവധി പ്രഖ്യാപിച്ചത്.

ബീമാപ്പള്ളി ഉറൂസിന് 15നാണ് തുടക്കമാകുന്നത്. രാവിലെ 11ന് ബീമാപ്പള്ളി മുസ്ലിം ജമാഅത്ത് പ്രസിഡന്റ് മാല മാഹിന്‍ പതാക ഉയര്‍ത്തും. 15 മുതല്‍ 24 വരെ വിവിധ വിഷയങ്ങളില്‍ മതപണ്ഡിതര്‍ പ്രഭാഷണം നടത്തും. സമാപന ദിവസമായ 25 ന് 1.30ന് പട്ടണപ്രദക്ഷിണം. രാവിലെ ആറിനുള്ള ഖുര്‍ആന്‍ ഖത്തം ദമാമിനു ശേഷമുള്ള നേര്‍ച്ച വിതരണത്തോടെ ഉറൂസിന് സമാപനമാകും. ഉറൂസ് പ്രമാണിച്ച് വിവിധ ഭാഗങ്ങളില്‍ നിന്ന് കെ.എസ്.ആര്‍.ടി.സി പ്രത്യേക സര്‍വീസ് നടത്തുമെന്ന് ബീമാപ്പള്ളി മുസ്ലിം ജമാഅത്ത് ജനറല്‍ സെക്രട്ടറി ഷാജഹാന്‍, പ്രസിഡന്റ് മാല മാഹിന്‍,ട്രഷറര്‍ എം.ഐ. നൗഷാദ് എന്നിവര്‍ അറിയിച്ചു.

ക്രമസമാധാനവും തീര്‍ഥാടകരുടെ സുരക്ഷയും ഉറപ്പാക്കുന്നതിന് പട്രോളിംഗ്, എയ്ഡ് പോസ്റ്റ്, സിസിടിവി ക്യാമറ ഉള്‍പ്പെടെയുള്ള നിരീക്ഷണ സംവിധാനങ്ങള്‍ തിരുവനന്തപുരം സിറ്റി പോലീസ് ഒരുക്കുന്നുണ്ട്. ലഹരിവിരുദ്ധ ക്യാമ്പയിനുകളും ഉത്സവമേഖലയില്‍ എക്സൈസ് പ്രത്യേക സ്‌ക്വാഡിന്റെ നിരീക്ഷണവും പരിശോധനയും ഉണ്ടാകും.

തീര്‍ഥാടകര്‍ക്കായി ആരോഗ്യവകുപ്പിന്റെ നേതൃത്വത്തില്‍ പ്രത്യേക മെഡിക്കല്‍ ക്യാമ്പും പ്രാഥമിക ശുശ്രൂഷാ കേന്ദ്രവും പ്രവര്‍ത്തിക്കും. ആംബുലന്‍സ് സൗകര്യവുമുണ്ടാകും. അഗ്‌നിസുരക്ഷാസേനയുടെ അഞ്ച് പേരടങ്ങുന്ന യൂണിറ്റ് പ്രവര്‍ത്തിക്കും. ഉത്സവമേഖലയിലേയും അനുബന്ധ പ്രദേശങ്ങളിലേയും മാലിന്യങ്ങള്‍ നീക്കം ചെയ്യുന്നതിനും വൃത്തിയാക്കുന്നതിനും അടിയന്തര നടപടി സ്വീകരിച്ചിട്ടുണ്ട്.

ബയോ ടോയ്ലെറ്റ് യൂണിറ്റ്, മെഡിക്കല്‍ ടീം, ആംബുലന്‍സ് സൗകര്യം എന്നിവയും തിരുവനന്തപുരം കോര്‍പ്പറേഷന്‍ സജ്ജീകരിക്കും. തീര്‍ത്ഥാടകരുടെ അവശ്യസൗകര്യങ്ങള്‍ക്കായി ബീമാപള്ളി അമിനിറ്റി സെന്റര്‍ തുറക്കും. ബീമാപള്ളി അമിനിറ്റി സെന്ററിന്റ ഔപചാരിക ഉദ്ഘാടനം തിരുവനന്തപുരം ജില്ലയിലെ നവകേരളസദസ്സ് സമാപനത്തിന് ശേഷം നടത്തും. അവസാനവട്ട ഒരുക്കങ്ങള്‍ വിലയിരുത്തുന്നതിനായി ഡിസംബര്‍ അഞ്ചിന് ബീമാപള്ളിയില്‍ അവലോകനയോഗം ചേരും.