ആന്ധ്രപ്രദേശില്‍ പാസഞ്ചർ ട്രെയിനിലേക്ക് മറ്റൊരു ട്രെയിൻ ഇടിച്ചുകയറി വൻ അപകടം

29-10-2023

ഹൈദരാബാദ്: ആന്ധ്രപ്രദേശില്‍ പാസഞ്ചർ ട്രെയിനിലേക്ക് മറ്റൊരു ട്രെയിൻ ഇടിച്ചുകയറി വൻ അപകടം. ഏഴുപേർ മരിച്ചു. 25 പേർക്ക് പരിക്കേറ്റിട്ടുണ്ട്. ആന്ധ്രയിലെ വിഴിനഗരത്തിലാണ് സംഭവം. വിഴിനഗരത്തിൽനിന്നും റായഗഡയിലേക്ക് പോവുകയായിരുന്ന പാസഞ്ചർ ട്രെയിനും വിശാഖപട്ടണത്ത് നിന്ന് പാലസയിലേക്ക് പോവുകയായിരുന്നു മറ്റൊരു ട്രെയിനുമാണ് അപകടത്തിൽപെട്ടത്.

അപകടത്തിനു പിന്നിലെ കാരണം വ്യക്തമായിട്ടില്ല. ഇടിയുടെ ആഘാതത്തില്‍ പാസഞ്ചര്‍ ട്രെയിനിന്‍റെ മൂന്ന് ബോഗികള്‍ പാളം തെറ്റിയെന്നാണ് പ്രാഥമിക വിവരം. രക്ഷാപ്രവര്‍ത്തനം പുരോഗമിക്കുകയാണ്. പ്രാദേശിക ഭരണകൂടം ദേശീയ ദുരന്ത നിവാരണ സേനയുടെ സഹായം തേടിയിട്ടുണ്ട്. സമീപ ജില്ലകളില്‍നിന്ന് ആംബുലന്‍സുകള്‍ അപകടസ്ഥലത്തേക്ക് എത്തിക്കാന്‍ മുഖ്യമന്ത്രി ജഗന്‍ മോഹന്‍ റെഡ്ഡി നിര്‍ദേശം നല്‍കി.

പരിക്കേറ്റവര്‍ക്ക് ചികിത്സ ഉറപ്പാക്കണമെന്നും ഉദ്യോഗസ്ഥര്‍ അടിയന്തര ദുരന്തനിവാരണ പ്രവര്‍ത്തനങ്ങളില്‍ ഏര്‍പ്പെടണമെന്നും മുഖ്യമന്ത്രി നിര്‍ദേശിച്ചു. പാസഞ്ചർ ട്രെയിൻ നിർത്തിയിട്ടിരിക്കുകയായിരുന്ന ട്രാക്കിലേക്ക് വന്ന എക്‌സ്പ്രസ് ട്രെയിൻ ഇടിച്ചുകയറുകയായിരുന്നു. പാസഞ്ചർ ട്രെയിനിലുണ്ടായിരുന്നവരാണ് മരിച്ചതെന്നാണ് റിപ്പോർട്ട്.