സ്വന്തം മകള്‍ക്കെന്ന പോലെ ഒരുനാട് മുഴുവന്‍ കരുതലും സ്‌നേഹവുമായി ഒന്നിച്ചുനിന്നപ്പോള്‍ നിശ്ചയിച്ചുറപ്പിച്ച മുഹൂര്‍ത്തത്തില്‍ തന്നെ രാമല വിവാഹിതയായി

18-10-2023

തിരുവനന്തപുരം: സ്വന്തം മകള്‍ക്കെന്ന പോലെ ഒരുനാട് മുഴുവന്‍ കരുതലും സ്‌നേഹവുമായി ഒന്നിച്ചുനിന്നപ്പോള്‍ നിശ്ചയിച്ചുറപ്പിച്ച മുഹൂര്‍ത്തത്തില്‍ തന്നെ രാമല വിവാഹിതയായി. രാമലയെ ചെറുവക്കല്‍ സ്വദേശി സുമേഷിനെ കൈപിടിച്ചേല്‍പ്പിച്ചപ്പോള്‍ അച്ഛന്‍ സനല്‍കുമാറിന് പറഞ്ഞറയിക്കാന്‍ പറ്റാത്ത സന്തോഷം.

ഒറ്റ രാത്രിയില്‍ തലസ്ഥാനത്തെ പ്രളയത്തില്‍ മുക്കിയ മഴപെയ്തപ്പോള്‍ രാമലയുടെ കല്യാണപ്പുടവ ഉള്‍പ്പെടെ സകലതും നശിച്ചുപോയത് കഴിഞ്ഞ ദിവസം വലിയ വാര്‍ത്തയായിരുന്നു. ഇതോടെ കേരളത്തിന്റെ വിവിധ ഭാഗങ്ങളില്‍ നിന്നും പണമായും വസ്ത്രമായും നിരവധിപേര്‍ സഹായമെത്തിച്ചു. പ്രതിപക്ഷ നേതാവ് വിഡി സതീശനും ഇന്നലെ ഉച്ചയോടെ വീട്ടിലെത്തി കല്യാണത്തിന് വേണ്ട എല്ലാ സഹായവും ഉറപ്പാക്കി. ഇതോടെയാണ് സനല്‍കുമാറിന് ആശ്വാസമായത്.

ഓട്ടോ ഡ്രൈവര്‍ ജി സനല്‍കുമാറും കുടുംബവും 28 വര്‍ഷമായി കടകംപള്ള കാക്കോട് പാലത്തിനു സമീപംഷീറ്റുമേഞ്ഞ കൊച്ചു വീട്ടിലാണ് താമസിച്ചിരുന്നത്. കഴിഞ്ഞയാഴ്ച മഴ ശക്തമായതോടെ മകന്‍ ഹരിയുടെ വീട്ടിലേക്ക് ഇവര്‍ താമസം മാറി. മഴ കുറയുമ്പോള്‍ വീട്ടിലേക്ക് തിരിച്ചെത്താം എന്നാണ് കരുതിയത്. എന്നാല്‍ തലസ്ഥാനത്തെ അപ്രതീക്ഷിത പ്രളയത്തില്‍ വീട്ടില്‍ മുഴുവന്‍ വെള്ളം കയറിയതോടെ വിവാഹത്തിനായി വാങ്ങിയ അരിയും പലവ്യഞ്ജനങ്ങളും ഉള്‍പ്പെടെ മുഴുവന്‍ സാധനങ്ങളും ചെളിവെള്ളത്തില്‍ മുങ്ങിപ്പോകുകയായിരുന്നു.

വിവാഹപ്പുടവ പോലും ഇല്ലാതെ മകളെ എങ്ങനെ കതിര്‍മണ്ഡപത്തില്‍ എത്തിക്കും എന്നറിയാതെ കുഴഞ്ഞ സനല്‍കുമാറിനെ അത്ഭുതപ്പെടുത്തിയാണ് പലരും സഹായവുമായെത്തിയത്. രാമലയുടെ വരനായ സുമേഷ് വിളിച്ച് വസ്ത്രങ്ങള്‍ താന്‍ കൊണ്ടുവന്നോളാം എന്ന് ഉറപ്പുനല്‍കിയിരുന്നു. എന്നാല്‍ അതിനുമുമ്പ് തന്നെ നെടുമങ്ങാട് അഗ്നിശമനാ വിഭാഗം ഉദ്യോഗസ്ഥനായ സജീവ് കുമാറും മകളുമെത്തി രാമലയ്ക്ക്ുള്ള വിവാഹ വസ്ത്രം വാങ്ങി നല്‍കി. തുടര്‍ന്ന് മറ്റു പലരും കൈകോര്‍ത്തതോടെ സനല്‍കുമാര്‍ വിചാരിച്ചതിലും മനോഹരമായി വിവാഹം നടന്നു.