സിബില്‍ സ്‌കോര്‍ ബാങ്കിലെത്താതെ തന്നെ മനസിലാക്കാനുള്ള സേവനമായെത്തുകയാണ് മുന്‍നിര ഡാറ്റാ അനലിറ്റിക്സ് ആന്‍ഡ് ഡിസിഷനിംഗ് കമ്പനികളില്‍ ഒന്നായ എക്സ്പീരിയന്‍ ഇന്ത്യ

16-11-2022

ബാങ്കുകളില്‍ നിന്നും വായ്പയെടുക്കാന്‍ ഉദ്ദേശിക്കുന്നവരെ സംബന്ധിച്ച് പ്രധാനമാണ് ക്രെഡിറ്റ് സ്‌കോര്‍ അഥവാ സിബില്‍ സ്‌കോര്‍. വ്യക്തിഗത ക്രെഡിറ്റ് സ്‌കോര്‍ അനുസരിച്ചാണ് ഒരാള്‍ക്ക് എത്ര തുക ലോണായി നല്‍കണമെന്ന് ബാങ്കുകള്‍ നിശ്ചയിക്കുക. ലോണിനായി ബാങ്കില്‍ എത്തുമ്പോഴാകും പലരും തങ്ങളുടെ ക്രെഡിറ്റ് സ്‌കോര്‍ കുറവാണെന്ന കാര്യം മനസിലാക്കുക. ഈ സാഹചര്യത്തില്‍ തങ്ങളുടെ സിബില്‍ സ്‌കോര്‍ ബാങ്കിലെത്താതെ തന്നെ മനസിലാക്കാനുള്ള സേവനമായെത്തുകയാണ് മുന്‍നിര ഡാറ്റാ അനലിറ്റിക്സ് ആന്‍ഡ് ഡിസിഷനിംഗ് കമ്പനികളില്‍ ഒന്നായ എക്സ്പീരിയന്‍ ഇന്ത്യ. വാട്ട്സ്ആപ്പില്‍ ക്രെഡിറ്റ് സ്‌കോര്‍ സൗജന്യമായി പരിശോധിക്കാന്‍ കഴിയുന്ന സേവനമാണ് ഇന്ത്യന്‍ ഉപഭോക്താക്കള്‍ക്കായി എക്‌സ്പീരിയന്‍ ഇന്ത്യ അവതരിപ്പിച്ചിട്ടുള്ളത്. ഇതിലൂടെ ഉപഭോക്താക്കള്‍ക്ക് അവരുടെ എക്‌സ്പീരിയന്‍ ക്രെഡിറ്റ് റിപ്പോര്‍ട്ടുകള്‍ പതിവായി പരിശോധിക്കാനും ക്രെഡിറ്റ് പോര്‍ട്ട്‌ഫോളിയോ എളുപ്പത്തില്‍ നിരീക്ഷിക്കാനും കഴിയും. ഒരാളുടെ ക്രെഡിറ്റ് റിപ്പോര്‍ട്ട് എപ്പോള്‍ വേണമെങ്കിലും ലഭ്യമാക്കുന്നതിനുള്ള വേഗമേറിയതും സുരക്ഷിതവും സൗകര്യപ്രദവുമായ മാര്‍ഗ്ഗമാണ് എക്‌സപീരിയന്‍ ഇന്ത്യ പ്രദാനം ചെയ്യുന്നത്.

 നല്ല കാര്യങ്ങള്‍ക്കായി ഡാറ്റ ഉപയോഗിക്കാനുള്ള എക്സ്പീരിയന്റെ ദൗത്യത്തിലെ സുപ്രധാന നാഴികക്കല്ലാണിതെന്നും ഉപഭോക്താക്കള്‍ക്ക് ക്രെഡിറ്റ് വിവരങ്ങള്‍  എളുപ്പത്തില്‍  ലഭ്യമാക്കണമെന്നും  ഇന്ത്യയില്‍ ശക്തമായ ഒരു ക്രെഡിറ്റ് ഇക്കോസിസ്റ്റം നിര്‍മ്മിക്കണമെന്നും ഞങ്ങള്‍ ആഗ്രഹിക്കുന്നതായും എക്സ്പീരിയന്‍ ഇന്ത്യയുടെ കണ്‍ട്രി മാനേജര്‍ നീരജ് ധവാന്‍ പറഞ്ഞു. വാട്ട്സ്ആപ്പ് വഴി സൗജന്യമായി അവരുടെ ക്രെഡിറ്റ് സ്‌കോറുകള്‍ പരിശോധിക്കാന്‍ കഴിയുന്നതിലൂടെ മികച്ച ക്രെഡിറ്റ് തീരുമാനങ്ങള്‍ എടുക്കാനും നല്ല സാമ്പത്തിക ശീലങ്ങള്‍ വളര്‍ത്തിയെടുക്കാനും ഇതിലൂടെ അവരുടെ സാമ്പത്തിക സ്ഥിതി മെച്ചപ്പെടുത്തുന്നതിനും സഹായിക്കുമെന്ന് അദ്ദേഹം പറഞ്ഞു.
 
ലളിതമായ ഘട്ടങ്ങളിലൂടെ ഉപഭോക്താക്കള്‍ക്ക് അവരുടെ ക്രെഡിറ്റ് സ്‌കോറുകള്‍ സൗജന്യമായി വാട്ട്സ്ആപ്പില്‍ പരിശോധിക്കാം: 

എക്‌സ്പീരിയന്‍ ഇന്ത്യയുടെ വാട്ട്സ്ആപ്പ് നമ്പറായ +91-9920035444-ലേക്ക് ‘Hey’ എന്ന മെസേജ് അയയ്ക്കുക 

നിങ്ങളുടെ പേര്, ഇ-മെയില്‍ ഐഡി, ഫോണ്‍ നമ്പര്‍ എന്നിവ പോലുള്ള അടിസ്ഥാന വിശദാംശങ്ങള്‍  നല്‍കുക 

വാട്ട്സ്ആപ്പ്  വഴി നിങ്ങളുടെ എക്‌സ്പീരിയന്‍ ക്രെഡിറ്റ് സ്‌കോര്‍ തല്‍ക്ഷണം ലഭ്യമാകും

നിങ്ങളുടെ രജിസ്റ്റര്‍ ചെയ്ത ഇ-മെയില്‍ ഐഡിയിലേക്ക് ക്രെഡിറ്റ് റിപ്പോര്‍ട്ട് ലഭിക്കും